Jewannes en Meriete 'adden bie hun 'ofje, in de buurte van Ellesdiek, nog 'n vrie hrôôte bôôhert. Mè de bôômen d'r in waeren al behoorlek op leeftied, en vee fruit gaeve ze nie mi.
Jewannes vond dat 'ie toch mèr is mee most in de vaart der volkeren en dèrmee besloot 'n om mè is wat mee dien bôôhert te gaen doen. 'Ie à z'n ôôhen ok nie in z'n zak, en dèmee'ad 'n à hezie dat 'r in de buurte meer en meer zwarte bessen heteelt wiere. Dè was bliekbaar een betere markt voe dan voe maehere peren. Dus moste die bôômen d'r toch mèr is uut.
Mé dat wère d'r zeker wè 'onderd, dus mee een hewone zaehe was dat nohhà een êêl karwij. Dus trok Jewannes op 'n zekere ochend richting Hoes om dè bie 'n herenommeerde hereedschappenwienkel is te gaen informere of ze dè nie iets beters voor adde.
Nou, ie trof 't. "Kiek 'ier is", zei de verkôôper van de wienkel (want 'ie kwam uut 's-'eeren'oek), "Ik 'eb 'ier een hrôôte kettingzeahe van een êêl hoed merk. Mee dat dienk zaeh je in ôôhuut twêê daehen 'êêl dien bôôhert om!".
Lang ver'ael kort: een tevreden Jewannes kwam thuus mee een spliksplinternieuwe joekel van een kettingzaehe, een nog vee tevredener verkôôper in Hoes achterlaetend.
Diezelfde mirreg gieng Jewannes voortvaerend an de slag. Mè dat viel toch noh lang nie mee! An 't ende van d'n dag 'ad 'n mee vee moeite twêê bôômen omhekrehe.
D'n anderen dag gieng 'n wee varder, mè 't bleef een toch 'êêl karwij. An 't ende van dien dag à 't 'n mi vee hemopper en hezwêêt mè vuuf bôômen omhekrehe. "Dat 'adde we nie afgesproke!"
Kwaed gieng Jewannes d'n dag d'r op terug nè dien wienkel in Hoes. "Je zei dat ik mee dit dieng in twêê daehen wè 'onderd bôômen om zou kunne zaehe, mèr ik komme me mee vee moeite tot 'ôôhuut vuuve op een dag!"
De verkôôper behreep d'r niks van. Ie bekeek de zeahe is hoed aandachtig, mè die kon d'r eihenlek niks biezonders an ontdekke. Om is te kieken of 't motortje wè hoed draaide, haf t'n is een flienke snok an 't touwtje. Mee vee kabaal sloeg 't machientje onmiddelek an.
Jewannes miek van schrik 'n hrôôte sprong achteruut.
"Hosternokke!! Wat is dat dan voe heluud?!?!"